მარნეულის მუნიციპალიტეტი, სოფელი იმირი, ნამოსახლარ „გადაჭრილი გორას“ არქეოლოგიური კომპლექსი. მარნეულში იმირის „გადაჭრილ გორაზე“ 2015 წლიდან არქეოლოგიური სამუშაოები მიმდინარეობს, არქეოლოგიური კვლევის შედეგად აღმოჩენილია ძვ.წ. VI ათასწლეულით დათარიღებული უძველესი ღვინის ჭურჭელი. კომპლექსური კვლევის შედეგად დადგინდა, რომ ადამიანმა პირველად 8000 წლის წინ საქართველოს ტერიტორიაზე მოაშინაურა ველური ვაზი და ღვინო დაწურა. არსებული აღმოჩენა, რომელიც ქართველ არქეოლოგებთან ერთად ტორონტოს უნივერსიტეტის ექსპედიციამ აღმოაჩინა, საქართველო და კონკრეტულად მარნეული მსოფლიო დონის მნიშვნელოვან კულტურულ და ტურისტულ ცენტრად აქცია. ადგილზე მიმდინარეობს სამუზეუმო კომპლექსის მშენებლობა და ყოველწლიური არქეოლოგიური ექსპედიცია.

წოფის ციხე ქვემო ქართლის მხარეში, მარნეულის მუნიციპალიტეტის სოფელ სადახლოსთან ახლოს მდებარეობს. იგი V-VI საუკუნეებით თარიღდება. სიმაგრე კლდოვან მთაზეა აგებული. შემორჩენილია ზედა ციხის ნანგრევები და გალავნის კედლის ფრაგმენტები, რომელიც სამხრეთის კლდოვანი ფერდობის დიდ ტერიტორიას ზღუდავს. ზედა ციხე ერთი ორი თანაბარი ზომის მონაკვეთადაა გაყოფილი ერთი განივი კედლით. ციხის ირგვლივ ოთხი ნახევარწრიული ბურჯია დატანებული. წყობის შემაგრებისთვის ბურჯები ჩართულია გალავნის კედლებშიც. აქვეა საცხოვრებელი კომპლექსების ნაშთები და მცირე ეკლესიის ნანგრევები. ზღუდის წყობაში და ციხის სხვა ნაწილების შენებისას გამოყენებულია უფრო ადრეული „ციკლოპური“ კედლები. ციხის გრძივი ღერძი განვითარებულია ჩრდილოეთიდან სამხრეთით და გეგმაში ელიფსური ფორმა აქვს. ციხის კედლები თეთრი ფერის კირქვის სწორკუთხა კვადრებით, ე.წ. უჯარმული წყობითაა ნაგები. წოფის ციხის მიდამოებში ადამიანის ცხოვრების კვალი ქვედა პალეოლითის ხანიდან დასტურდება, აქ აღმოჩენილია გვიანდელი ბრინჯაოსა და ადრინდელი რკინის ხანის ნამოსახლარებიც. ციხე-სიმაგრესთან ნასოფლარია, სადაც VI-VII საუკუნეებით დათარიღებული ორი დარბაზული ტიპის საყდარია შემორჩენილი.