მარნეულის მუნიციპალიტეტის თვითმმართველობის ინიციატივით და მხარდაჭერით, მიმდინარე წლის 25 ოქტომბერს (კვირა) 12:00 საათზე, სოფელ წერაქვში იმართება გამოჩენილი ქართველი მწერლის მიხეილ ჯავახიშვილის 135 წლის იუბილისადმი მიძღვნილი ღონისძიება.

ღონისძიებას საქართველოს ცენტრალური და ადგილობრივი ხელისუფლების წარმომადგენლები, გამოჩენილი მწერლები, მსახიობები, საზოგადო მოღვაწეები და მწერლის ოჯახის წევრები დაესწრებიან, სადაც კიდევ ერთხელ გაიხსენებენ მიხეილ ჯავახიშვილის ცხოვრებას და შემოქმედებას.
მწერლის იუბილისადმი მიძღვნილ ღონისძებაში მონაწილეობას ადგილობრივრივი შემოქმედებითი ჯგუფები და კოტე მარჯანიშვილის სახელობის თეატრის მსახიობები მიიღებენ, რომელებიც გააცოცხლებენ ჯავახიშვილის გამორჩეულ რომანებს და ცხოვრების მნიშვნელოვან ეპიზოდებს.
ღონისძიების ფარგლებში წარმოდგენილი იქნება მარნეულელი მხატვარის მანუჩარ პაპიძის პერსონალური ნამუშევრები და მარნეულის მუნიციპალიტეტში არსებული კულტურული მემკვიდრეობის ფოტოების გამოფენა. 
პარალელურად მოწყობილი და გამოფენილი იქნება მიხეილ ჯავახიშვილის ეპოქის დროინდელი სოფლისა და ქალაქის ეთნო-კუთხეები. ამასთანავე, გამომცემლობა „ინტელექტის“ მიერ მოეწყობა წიგნების გამოფენა. 
აღსანიშნავია, რომ დღესასწაული ჯავახიშვილობა, სოფელ წერაქვში, ტრადიციულად ყოველ წელს აღინიშნებოდა, თუმცა სამწუხაროდ 1991 წლიდან ეს ტრადიცია დავიწყებას მიეცა. წელს კი მარნეულის მუნიციპალიტეტის თვითმმართველობის ინიციატივით ეს დღესასწაული აღდგა.