მარნეულის მუნიციპალიტეტის თვითმმართველობის ინიციატივით და მხარდაჭერით, მიმდინარე წლის 25 ოქტომბერს სოფელ წერაქვში გაიმართა გამოჩენილი ქართველი მწერლის მიხეილ ჯავახიშვილის 135 წლის იუბილისადმი მიძღვნილი ღონისძიება.

ღონისძიებას საქართველოს ცენტრალური და ადგილობრივი ხელისუფლების წარმომადგენლები, გამოჩენილი მწერლები, მსახიობები, საზოგადო მოღვაწეები და მწერლის ოჯახის წევრები ესწრებოდნენ, სადაც კიდევ ერთხელ გაიხსენეს მიხეილ ჯავახიშვილის ცხოვრება და შემოქმედება.
მწერლის იუბილესადმი მიძღვნილ ღონისძებაში მონაწილეობას კოტე მარჯანიშვილის სახელობის თეატრის მსახიობები და ადგილობრივრივი შემოქმედებითი ჯგუფები იღებდნენ, რომელებმაც გააცოცხლეს ჯავახიშვილის გამორჩეული რომანები და ცხოვრების მნიშვნელოვანი ეპიზოდები.
ღონისძიების ფარგლებში წარმოდგენილი იყო მარნეულელი მხატვარის მანუჩარ პაპიძისა და ნინი ცარციძის პერსონალური ნამუშევრები და მარნეულის მუნიციპალიტეტში არსებული კულტურული მემკვიდრეობის ფოტოები.
პარალელურად მოეწყო და გამოიფინა მიხეილ ჯავახიშვილის ეპოქის დროინდელი სოფლისა და ქალაქის ეთნო-კუთხეები. ამასთანავე, გამომცემლობა „ინტელექტმა“ მოაწყო წიგნების გამოფენა. 
აღსანიშნავია, რომ ღონისძიებაზე მარნეულისა და ჰუჯაბის ეპარქიის ეპისკოპოსმა მეუფე გიორგიმ, სრულიად საქართველოს კათოლიკოს-პატრიარქის მიერ მიხეილ ჯავახიშვილის იუბილისადმი მიძღვნილი წერილი წაიკითხა. 
დღესასწაული ჯავახიშვილობა, სოფელ წერაქვში, ტრადიციულად ყოველ წელს აღინიშნებოდა, თუმცა სამწუხაროდ 1991 წლიდან ეს ტრადიცია დავიწყებას მიეცა. წელს კი მარნეულის მუნიციპალიტეტის თვითმმართველობის ინიციატივით ეს დღესასწაული აღდგა.