დღეს, მარნეულის მუნიციპალიტეტის გამგეობის შენობაში მოეწყო საჯარო განხილვა მარნეულის №3 ბაგა-ბაღის რეაბილიტაციის ქვე-პროექტის გარემოს დაცვის მართვის გეგმის შესახებ.
შეხვედრას ესწრებოდნენ მარნეულის მუნიციპალიტეტის გამგებელი, საბავშვო ბაღის აღსაზრდელების მშობლები, მასწავლებლები და საბავშვო ბაღის სხვა თანამშრომლები.
აღსანიშნავია, რომ ქვე-პროექტი ითვალისწინებს მარნეულის №3 ბაგა-ბაღის შენობის რეაბილიტაციას, რომელიც მდებარეობს 26 მაისის ქუჩაზე, ქალაქ მარნეულში. არსებული საბავშვო ბაღი არის ორსართულიანი შენობა, რომელიც აშენდა გასული საუკუნის 80-იან წლებში, საბავშვო ბაღის ინტერიერი და ექსტერიერი ძლიერ დაზიანებულია და საჭიროებს სრულ რეაბილიტაციას.
აღსანიშნავია, რომ ამჟამად საბავშვო ბაღი მოქმედია და ემსახურება 470 ბავშვს. პერსონალის რაოდენობა შეადგენს 41 ადამიანს და მათი ხელფასის გადახდა ხდება მარნეულის მუნიციპალიტეტის მიერ. ქვე-პროექტის განხორციელების ძირითად სარგებელს წარმოადგენს ბავშვებისთვის და მასწავლებლებისთვის პირობების გაუმჯობესება საბავშვო ბაღში.
ადგილობრივი მუნიციპალიტეტის ადმინისტრაცია მთლიანად იღებს პასუხისმგებლობას, რომ საბავშვო ბაღის პერსონალი მიიღებს ხელფასს სარეაბილიტაციო სამუშაოების წარმოების პერიოდში.
ქვე-პროექტი ხორციელდება რეგიონული და მუნიციპალური ინფრასტრუქტურის განვითარების მეორე პროექტის ფარგლებში, რომელიც მიმდინარეობს მსოფლიო ბანკის მხარდაჭერით.