19 მარტს მარნეულის №2 და №3 საჯარო სკოლებში ნოვრუზ ბაირამი აღნიშნეს.
დღესასწაული სკოლებში ღია ცის ქვეშ, ტკბილეულის სუფრებით და კონცერტებით აღინიშნა, სადაც მიწვეული იყვნენ მარნეულის მუნიციპალიტეტის გამგებელი მერაბ თოფჩიშვილი, მარნეულის რესურსცენტრის ხელმძღვანელი რუსლან გაჯიევი და თვითმმართველობის ხელმძღვანელი პირები.
გამგებელმა პედაგოგებს, მოსწავლეებსა და მშობლებს აზეირბაჯანელთა უძველესი ეროვნული დღესასწაული მიულოცა.
ღონისძიებების შემდეგ, გამგებელმა მერაბ თოფჩიშვილმა ნოვრუზის დღესასწაული ქუჩაში ფეხით მოსიარულეებსაც მიულოცა.
დღესასწაული, რომელიც 17 მარტიდან იწყება და თვის ბოლომდე გრძელდება, კულმინაციას 21 მარტს, გაზაფხულის ბუნიობის დროს აღწევს.
მიჩნეულია, რომ ამ დღესასწაულის შემდეგ ბუნება გამოფხიზლებას და გამოცოცხლებას იწყებს.