დღეს მარნეულის მუნიციპალიტეტის სოფელ თამარისში ახლადგახსნილი მარწყვის  სასათბურე მეურნეობის დასათვალიერებლად ადგილზე ჩავიდნენ საქართველოში ისრაელის სრულუფლებიანი ელჩი იუვალ ფუქსი, ქვემო ქართლის რწმუნებულ- გუბერნატორი პაატა ხიზანაშვილი, მარნეულის მუნიციპალიტეტის გამგებელი მერაბ თოფჩიშვილი, კომპანია „ისრაგრინის“ დირექტორი  ილია შაპირი,  სოფლის მეურნეობის ქვემო ქართლის რეგიონალური სამმართველოს წარმომადგენლები და დაინტერესებული ფერმერები.  

300 კვადრატული მეტრის სათბურში, რომელიც მოწყობილია თანამედროვე ტექნოლოგიებით, მარწყვის მოყვანა  ჰიდროპონიკის სისტემის გამოყენებით მიმდინარეობს და იგი  ისრაელის საელჩოსა და  კომპანია „ისრაგრინის“ დაფინანსებით  2014 წელს აშენდა. აღნიშნული სათბური ამავე სოფელის მკვიდრს ფერმერს პავლე სივსივაძეს გადაეცა.
თანამედროვე ტექნოლოგიებით აღჭურვილი სათბურში დაინტერესებულ ფერმერებს  საშუალება ექნებათ თვალნათლივ დარწმუნდნენ ახალი ტექნოლოგიების გამოყენების ეკონომიკურ ეფექტიანობაში და  შეისწავლონ სათბურში მარწყვის წარმოების თანამედროვე ტექნოლოგია.  გარდა ამისა, ფერმერებში გავრცელდება მაღალმოსავლიანი მარწყვის ჯიშები, როგორიცაა „აბლიონი“ და „ელიზავეტა II“.
ამ ეტაპისთვის სათბურში დარგულია 2800 ძირი მარწყვის ნერგი, საიდანაც თითოეული ძირი პირველ ეტაპზე დაახლოებით კილონახევარ ნაყოფს მოისხავს.  
სათბურში პირველ მოსავალს 20-25 მარტისთვის ელიან.
აღსანიშნავია, რომ სოფლის მეურნეობის ქვემო ქართლის რეგიონალური სამმართველოს წარმომადგენლების,   საქართველოში ისრაელის სახელმწიფო ელჩისა და ისრაული  კომპანია  „ისრაგრინის“ ექსპერტების  ერთობლივი ძალისხმევით მარნეულის მუნიციპალიტეტის გამგეობაში გასულ წელს ჩატარდა ორდღიანი ტრენინგი თემაზე: სოფლის მეურნეობის განვითარების ხელშეწყობა და „ბოსტნეულის მოსავლიანობის გაზრდა  უახლესი ტექნიკის გამოყენებით. სემინარს  ესწრებოდნენ ქვემო ქართლის რეგიონის სხვადასხვა მუნიციპალიტეტის, ასევე გორის მუნიციპალიტეტის ფერმერები, მეწარმეები და სპეციალისტები.