დღეს მარნეულის მუნიციპალიტეტის გამგეობის საკონფერენციო დარბაზში არასამთავრობო ორგანიზაცია „ქალთა საინფორმაციო ცენტრმა“ ადგილობრივი თვითმმართველობის წარმომადგენლებთან სამუშაო შეხვედრა გამართა.
შეხვედრის ძირითად თემას პროექტის პრეზენტაცია წარმოადგენდა, რომელიც გულისხმობს “ერთი ფანჯრის“ პრინციპის დანერგვას ადგილობრივ თვითმმართველობაში მოწყვლადი ჯგუფების პრობლემათა გადასაჭრელად.
შეხვედრის დამწრეებს, პროექტის კონცეფციისა და მიზნების შესახებ ექსპერტი თვითმმართველობის საკითხებში ალექსანდრე სვანიშვილი ესაუბრა. მისი განმარტებით კონცეფციის მიზანია „ერთი ფანჯრის“ პრინციპის მეთოდის გამოყენებით კოორდინირებული გახადოს სახელმწიფო უწყებების, ადგილობრივი თვითმმართველობის ორგანოებისა და სამოქალაქო სექტორის საქმიანობა და ხელი შეუწყოს მათ მიერ მუნიციპალიტეტში მცხოვრები მოწყვლადი ჯგუფების პრობლემის ოპერატიულად, კომპლექსურად, გამჭვირვალედ და სამართლიანად გადაწყვეტას.
„ერთი ფანჯრის“ პრინციპი გულისხმობს მოქალაქეებისთვის მიწოდებული მომსახურების მოდელს, რომლის დროსაც ერთი მუნიციპალიტეტის წარმომადგენლობითი და აღმასრულებელი ორგანოს თანამდებობის პირები, სახელმწიფოს უწყებებისა და მუნიციპალიტეტში მოქმედ დაინტერესებულ არასამთავრობო ორგანიზაციების წარმომადგენლებთან ერთად, პერიოდულად იკრიბებიან და უსმენენ სოციალურად დაუცველ, დევნილ და კონფლიქტის შედეგად დაზარალებულ მოქალაქეებს, რომლებიც თავიანთ მწვავე სოციალურ, ეკონომიკურ ჯანდაცვისა და სამართლებრივ პრობლემებს წარმოადგენენ მათ წინაშე. შეხვედრების ჩატარების მეთოდოლოგია გულისხმობს პრობლემური შემთხვევების წინასწარ მოძიებას, გადამოწმებას და დოკუმენტირებას შეხვედრაზე წარსადგენად.
ქალთა საინფორმაციო ცენტრის წარმომადგენლებს, გამგებელმა, მერაბ თოფჩიშვილმა მადლობა გადაუხადა აღნიშნული პროექტის პრეზენტაციისთვის და მათ მიერ წამოყენებული ახალი ინიციატივის სამომავლოდ განხორციელებაში სრული მხარდაჭერა აღუთქვა.