მარნეულის მუნიციპალიტეტის გამგებელმა მერაბ თოფჩიშვილმა თვითმმართველობის ხელმძღვანელ პირებთან ერთად ქალაქ მარნეულში წერეთლისა და თბილისის ქუჩებზე „საქართველოს გაერთიანებული წყალმომარაგების კომპანიის“ მიერ სასმელი წყლის ქსელების რეაბილიტაციის პროცესი დაათვალიერა და ადგილობრივ მოსახლეობას გაესაუბრა.
როგორც მოქალაქეებმა მუნიციპალიტეტის ხელმძღვანელ პირებთან საუბრისას განმარტეს სასმელი წყლის მილებზე მიმდინარე სარეაბილიტაციო სამუშაოების გამო, რომელიც დროში იწელება, დღეებია ოჯახებს წყალი არ მიეწოდებათ. კიდევ ერთი პრობლემა რომელიც ამ ქუჩებზე მცხოვრებ მოსახლეობას აწუხებს მიმდინარე სამუშაოების გამო გადათხრილი ქუჩები და ცალკეულ ავარიულ შემთხვევებზე კომპანიის მხრიდან დაგვიანებული რეაგირებაა.
ადგილზე „საქართველოს გაერთიანებული წყალმომარაგების კომპანიის“ წარმომადგენლებიც იმყოფებოდნენ, რომელთაც გამგებელმა, მერაბ თოფჩიშვილმა, აღნიშნულ ქუჩებზე დღემდე არსებული და მოუგვარებელი პრობლემის მიზეზები გამოჰკითხა და ვითარების ოპტიმალური გზით გამოსწორება მოსთხოვა.
კომპანიის წარმომადგენლებმა განმარტება გააკეთეს რეაბილიტაციის პროცესში წარმოქმნილ პრობლემებთან დაკავშირებით და თვითმმართველობის ხელმძღვანელობას და ადგილობრივ მოსახლეობას არსებული პრობლემის უახლოეს მომავალში აღმოფხვრას დაჰპირდნენ.