ზამთრის სეზონთან დაკავშირებით მარნეულის მუნიციპალიტეტის თვითმმართველობისგან 90 სოციალურად შეჭირვებულ და ომში დაღუპულ ჯარისკაცთა ოჯახებს საშეშე მერქანი საჩუქრად გადაეცათ.
თითოეული კომლისთვის განკუთვნილი 2 კუბური მეტრის მოცულობის შეშის დამზადებისა და ოჯახებამდე მიტანას თავად თვითმმართველობა უზრუნველყოფს, რომლის პროცესშიც ჩართულია გამგეობის სოციალური, მუნიციპალური ზედამხედველობის სამსახურები, შპს „კომუნალური მეურნეობა“ და საკრებულო.
„ძალიან მნიშვნელოვანია ჩვენთვის შეშის მარაგის გადმოცემა, რადგან ფაქტიურად მთელი ზამთრის განმავლობაში ვერ ვახერხებდით ღუმელის დანთებას, მხოლოდ დილით ავანდებდით, რომ ოდნავ გაგვეთბო სახლი. მადლობას ვუხდით ადგილობრივ ხელისუფლებას, იმისთვის რომ გულთან მიიტანეს ჩვენი გასაჭირი და დაგვეხმარნენ.“- განაცხადა აფხაზეთის ომში დაღუპული იური ნადირაძის დედამ, ელენე ნადირაძემ.
ბენეფიციარებისთვის შეშის დარიგების პროცესი 10 თებერვალს დაიწყო და ეტაპობრივად მიმდინარეობს.