28-29 მაისს, სოფლის მეურნეობის სამეცნიერო-კვლევითი ცენტრმა და აგროკომპანია „ლომთაგორამ“ მარნეულში საერთაშორისო საველე სემინარს უმასპინძლა, რომელიც საქართველოს სოფლის მეურნეობის სამინიტროს, გაეროს სურსათისა და სოფლის მეურნეობის ორგანიზაციის (FAO), სიმინდისა და ხორბლის გაუმჯობესების საერთაშორისო ცენტრის (CIMMYT) და სოფლის მეურნეობის კვლევის საერთაშორისო ცენტრის (ICARDA) მხარდაჭერით გაიმართა.
ქართველ სპეციალისტებთან ერთად სემინარში 10 ქვეყნის წარმომადგენელი მონაწილეობდა.
აღნიშნულ სემინარში მონაწილეობას მარნეულის მუნიციპალიტეტის გამგებელი მერაბ თოფჩიშვილი და მისი მოადგილე ზაურ ტაბატაძე იღებდნენ.
სემინარის ფარგლებში გაეცვნენ ხორბლის 100-მდე ჯიშს, რომელთაგან ზოგიერთი ჯიშის საშუალო მოსავლიანობა ჰექტარზე 11 ტონას აჭარბებს. დაათვალიერეს ენდემური, ქართული და აბორიგენული ჯიშები, რომლებიც ხასიათდება ძლიერი იმუნიტეტით, ფერმენტაციის მაღალი და პურ-ცხობის საუკეთესო თვისებებით. საერთაშორისო სემინარი საშემოდგომო ხორბლის გაუმჯობესების პროგრამის (IWWIP) ფარგლებში ხორციელდება და ქვეყნის მასშტაბით საშემოდგომო ხორბლის კულტურის განვითარების, ამ კუთხით გლობალური გამოწვევების განხილვასა და სხვადასხვა ქვეყნების გამოცდილების გაზიარებას ისახავდა მიზნად.
საშემოდგომო ხორბლის გაუმჯობესების პროგრამის ფარგლებში, სამეცნიერო-კვლევითი ცენტრის, „ლომთაგორას“ სამეცნიერო ჯგუფისა და ICARDA-ს ერთობლივი თანამშრომლობა ხელს შეუწყობს სოფლის მეურნეობის სექტორში ფერმერებისთვის ახალი ტექნოლოგიებისა და სამუშაო მეთოდების დანერგვას, რაც თავის მხრივ საშუალებას მოგვცემს ჩვენს რეგიონში გავხდეთ ერთ-ერთი წამყვანი ქვეყანა ამ მიმართულებით.