20 ივნისს მომხდარმა სტიქიამ მარნეულის მუნიციპალიტეტი მნიშვნელოვნად დააზარალა. ძლიერი წვიმის, სეტყვის და ქარიშხლის შედეგად განსაკუთრებით დაზარალდა სოფელ თამარისისა და წერეთლის მოსახლეობა. განადგურებულია ხეხილი და ნათესები. დაზიანებულია საცხოვრებელი სახლები და ადმინისტრაციული შენობები.

მუნიციპალიტეტის მოსახლეობისთვის მიყენებულ ზარალს, მუდმივმოქმედი, სპეციალური კომისია დაითვლის.
20 წუთიანმა ძლიერმა ქარმა სახურავი ახადა ქალაქ მარნეულის №81–ბ კორპუსს, სადაც ასევე დაზიანდა ბუნებრივი აირის მილიც. ქარის შედეგად მოთხრილმა ხემ დააზიანა მაზნიაშვილის ქუჩის №2 კორპუსი, ხოლო №4 კორპუსში სეტყვის შედეგად ჩაიმტვრა ფანჯრები. ქარმა სახურავი გადახადა რუსთაველის #33 კორპუსს. მნიშვნელოვნად დაზიანებულია ქალაქ მარნეულის #5 საჯარო სკოლის სახურავიც. გარდა ამისა, ნაწილობრივაა დაზიანებული ქალაქის სხვადასხვა უბნებში არსებული კორუსისა და ბინების სახურავებიც.
ქარიშხალმა მრავალწლოვანი ხეები ამოთხარა სოფელ თამარისშიც, დაზიანდა ელექტროენერგიის სადენები, რის გამოც მოსახლეობას რამდენიმე საათით შეზღუდული აქვთ ელექტროენერგიის მიწოდება. 
ძლიერმა წვიმამ და ქარმა სოფელ ალავარშიც გაანადგურა სასოფლო-სამეურნეო სავარგულები. ქარის შედეგად სახურავი აეხადა ჯანდარის დასახლებაში მდებარე ერთერთ სახლს.
სტიქიის შედეგების სალიკვიდაციოდ მარნეულის მუნიციპალიტეტის გამგებელმა მერაბ თოფჩიშვილმა გუშინ გვიან ღამით საგანგებო თათბირი ჩაატარა, რომელსაც გამგებლის მოადგილეები, საკრებულოს ხელმძღვანელი პირები, სამსახურისა და განყოფილების უფროსები ესწრებოდნენ.
სტიქიის შედეგების აღმოფხვრის მიზნით, მუნიციპალიტეტის მასშტაბით მთელი ღამის განმავლობაში მიმდინარეობდა გაწმენდითი სამუშაოები, რომელსაც ადგილზე აკვირდებოდა გამგებელი და შესაბამისი სამსახურის წარმომადგენლები.