დღეს, მარნეულის მუნიციპალიტეტში, სოფელ იმირში საქართველოს მთავრობის მხარდაჭერით, მიმდინარე საქართველოს ეროვნული მუზეუმისა და ღვინის ეროვნული სააგენტოს ერთობლივი საერთაშორისო პროექტის „ქართული ვაზისა და ღვინის კულტურის კვლევა“ - ფარგლებში აღმოჩენილი ძვ.წ. VI ათასწლეულით დათარიღებული არქეოლოგიური უბნების კონსერვაცია დასრულდა.
კონსერვაციის პროცესს მარნეულის მუნიციპალიტეტის გამგებლის მერაბ თოფჩიშვილის ინიციატივით ადგილობრივი თვითმმართველობის თანამშრომლები დაესწრნენ. უძველესი არქეოლოგიური აღმოჩენა მოინახულა მარნეულის დავით აღმაშენებლის სახელობის ეკლესიის წინამძღვარმა მამა ილია ჭიღლაძემაც, რომელმაც ისტორიული ძეგლის უნიკალურობასა და მის მნიშვნელობაზე ისაუბრა.
შეგახსენებთ, რომ არქეოლოგიური გათხრების შედეგად ქვემო ქართლში აღმოჩენილია VI ათასწლეულით დათარიღებული, უძველესი ყურძნის წიპწები. კომპლექსური კვლევის შედეგად დგინდება, რომ ველური ვაზი ადამიანმა პირველად საქართველოს ტერიტორიაზე მოიშინაურა და შემდეგ უკვე კულტურული ვაზისგან ღვინო დაწურა. კერამიკული ჭურჭლის ანაფხეკებში აღმოჩენილია კულტურული ვაზის მტევრის მარცვლები, რაც ამ ჭურჭელში ღვინის არსებობის დასტურია.
აღსანიშნავია, რომ სოფელ იმირში ექსპედიციას ხელმძღვანელობდა ეროვნული მუზეუმის არქეოლოგიური კოლექციების მთავარი კურატორი მინდია ჯალაბაძე.