ბიზნეს იდეების კონკურსის შესახებ საინფორმაციო შეხვედრები მარნეულის მუნიციპალიტეტის გამგეობაში გრძელდება. მიკრო და მცირე მეწარმეობის ხელშეწყობის პროგრამის შესახებ დეტალური ინფორმაცია, ააიპ რეგიონული განვითარების ასოციაციის (RDA) წარმომადგენელმა ილია გოგოლაძემ ამჯერად მუნიციპალიტეტში მცხოვრებ საზოგადოებრივად აქტიურ ქალბატონებს გააცნო.
შეხვედრაზე კონკურსის მიზანსა და მასში მონაწილეობის მისაღებად საჭირო პროცედურებზე ისაუბრეს, სადაც ასევე განიხილეს სხვა მნიშვნელოვანი დეტალები.
შეგახსენებთ, მიკრო და მცირე მეწარმეობის ხელშეწყობის პროგრამა ხორციელდება საქართველოს პრემიერ-მინისტრის მიერ ინიცირებული „აწარმოე საქართველოში“ პროგრამის ფარგლებში და მიზნად ისახავს საქართველოს რეგიონებში მიკრო და მცირე ბიზნესის განვითარებას– მეწარმეების დაფინანსებისა და ცოდნის ამაღლების გზით.
პროგრამას ქვეყნის მასშტაბით ახორციელებს სსიპ მეწარმეობის განვითარების სააგენტო კონტრაქტორი არასამთავრობო ორგანიზაციების მეშვეობით. ქვემო ქართლსა და სამცხე ჯავახეთში სააგენტოს კონტრაქტორია ააიპ რეგიონული განვითარების ასოციაცია (RDA).
მიკრო და მცირე მეწარმეობის ხელშეწყობის პროგრამის განხორციელება 2015 წლის 15 მარტიდან დაიწყო. ამჟამად მიმდინარეობს ბიზნეს იდეების კონკურსი. განაცხადების მიღება www.qartuli.ge ვებ-გვერდის მეშვეობით 2015 წლის 18 მაისამდე გაგრძელდება.