თბილისის მერი დავით ნარმანია და ადგილობრივ თვითმმართველობათა ეროვნული ასოციაციის პრეზიდენტი, რუსთავის მერი დავით ჯიქია, სასტუმრო ”ჰოლიდეი ინნ-ში" აღმოსავლეთ საქართველოს მუნიციპალიტეტების მერებსა და გამგებლებს შეხვდნენ.

სამუშაო შეხვედრას მარნეულის მუნიციპალიტეტის გამგებელი მერაბ თოფჩიშვილი და საკრებულოს თავჯდომარე ნაბი აბდულაევი დაესწრნენ, სადაც  თვითმმართველობების საქმიანობის გაუმჯობესების მიზნით კანონმდებლობაში შესატან ცვლილებებზე იმსჯელეს.
თბილისის მერის დავით ნარმანიას თქმით, დღევანდელი რიგით მეორე შეხვედრა, აღმოსავლეთ საქართველოს მუნიციპალიტეტებისთვის ჩატარდა. „ისევე, როგორც ქუთაისში გამართულ შეხვედრაზე, დღევენდელ შეხვედრაზეც მუნიციპალიტეტების მერებმა და გამგებლებმა წარმოადგინეს წინადადებები კანონმდებლობაში არსებული და გამოსასწორებელი ხარვეზების შესახებ, რათა ადგილობრივი თვითმმართველობის საქმიანობა უფრო მოქნილი, ქმედითი და ეფექტური გახდეს“, - განაცხადა დავით ნარმანიამ. თბილისის მერის თქმით, საუბარია ადგილობრივი თვითმმართველობის კოდექსში, შესყიდვების კანონმდებლობასა და სხვა მარეგულირებელ ნორმებში შესატან ცვლილებებზე.
მუნიციპალიტეტების მერებთან და გამგებლებთან მომდევნო, შემაჯამებელი შეხვედრა აპრილის ბოლომდე გაიმართება.