დღეს მარნეულის მუნიციპალიტეტის გამგეობის საკონფერენციო დარბაზში შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის, შეფასებისა და გამოცდების ეროვნული ცენტრის, შსს-ს აკადემიის წარმომადგენლები ეთნიკური უმცირესობების წარმომადგენელ აბიტურიენტებს შეხვდნენ.
შეხვედრაზე 100-მდე მე-12 კლასელი დაესწრო, რომლებსაც გამოცდების ეროვნული ცენტრის წარმომადგენლებმა ეროვნულ გამოცდებთან დაკავშირებით არსებულ სიახლეებზე და პროგრამა "1+4"-ს შესახებ ესაუბრნენ.
ღონისძიებაზე დამსწრე აბიტურიენტებს საქართველოს შინაგან საქმეთა სამინისტროს აკადემიის წარმომადგენელმა ასევე წარუდგინა პრეზენტაცია თემაზე - "შსს აკადემიის საბაკალავრო პროგრამა", რომლის შემდგომაც აბიტურიენტებთან საუბარი კითხვა-პასუხის რეჟიმში გაგრძელდა.
შეხვედრაში მონაწილეობა მიიღო შერიგებისა და სამოქალაქო თანასწორობის საკითხებში სახელმწიფო მინისტრის წარმომადგენელმა ქვემო ქართლში ზაურ დარგალმა, საქართველოს პრემიერ-მინისტრის თანაშემწე სავალან მირზოევმა, შეფასებისა და გამოცდების ეროვნული ცენტრის ლოჯისტიკის ჯგუფის კოორდინატორი მაია გაბუნიამ, საქართველოს შინაგან საქმეთა სამინისტროს აკადემიის უბნის ინსპექტორთა მომზადების ფაკულტეტის უფროსმა მამუკა ქოიავამ და მარნეულის საგანმანათლებლო რესურს ცენტრის ხელმძღვანელმა რუსლან გაჯიევმა.
შეგახსენებთ, რომ პროგრამა "1+4" საქართველოში 2010 წლიდან ხორციელდება. ეროვნული უმცირესობების წარმომადგენელი აბიტურიენტები ამ პროგრამის მეშვეობით მშობლიურ ენაზე უნივერსიტეტში ჩაბარების შემდეგ 1 წლის განმავლობაში ქართული ენის მოსამზადებელ კურსს გადიან. აღნიშნული კურსის წარმატებით დამთავრების შემდეგ, მეორე წელს პირველი კურსიდან აგრძელებენ სწავლას.