დღეს, 1989 წლის 9 აპრილს საქართველოს დამოუკიდებლობისათვის დაღუპულ გმირთა ხსოვნის პატივის მისაგებად, მარნეულის მუნიციპალიტეტში, სოფელ წერეთელში, ალგეთსა და თამარისში არსებული 9 აპრილის მემორიალები ადგილობრივი ხელისუფლების წარმომადგენლებმა და მოწვეულმა სტუმრებმა გვირგვინებით შეამკეს.

აღსანიშნავია, რომ სპეციალურად ამ დღისთვის მარნეულის კულტურის ცენტრის ინიციატივით პერფორმანსი გაიმართა, სადაც კიდევ ერთხელ გაიხსენეს ტრაგიკულ დღეს, თავისუფლებისთვის გმირულად დაღუპული საქართველოს მოქალაქეები.

ღონისძიებას მარნეულის მუნიციპალიტეტის მერის მოვალეობის შემსრულებელი, ზაურ ტაბატაძე, მარნეულის საკრებულოს თავმჯდომარე, ამირან გიორგაძე, პარლამენტის მაჟორიტარი დეპუტატი, ზაურ დარგალი, მარნეულის მერის მოადგილეები ლაშა ლობჯანიძე და კენან ომაროვი და საქართველოში აზერბაიჯანის საელჩოს წარმომადგენლები ესწრებოდნენ.

შეგახსენებთ, რომ 1989 წლის 9 აპრილს, თავისუფლებისთვის მებრძოლმა ახალგაზრდებმა, საკუთარი სიცოცხლის ფასად ქვეყანას დამოუკიდებლობა მოუტანეს.